Kategorie: Gedichte

Veröffentlicht am

Grüße2020

Erscht wur’s wuhl gar net ernst genumme:
Sollt’s de aus China rüberkumme,
dos Virus, wos noch kaaner kennt,
dos sich su schie „Corona“ nennt?
Doch uversaah do ging’s racht flink
üm ganzen Ardball ümering…
Wos ka mor machen? – wur gefregt,
un dann wurdn Regeln festgelegt.
Es hieß, de Gunge un de Alten,
die sollten nu wing Abstand halten.
De Schuln, de Kitas wardn geschlossen,
e jeder Gastwirt guckt verdrossen
in seine leere Gaststub nei.
Mor kunnt net meh in de Tschechei,
un aah net in dor Walt rümraasen.
War su wos schie mol dogewaasen?
Zwar: Hilfen gibt’s vun Staat – Milliarden!
Doch waar soll dos emol dorkarten?
Salbst in de Kirchn, do durft mor net,
un bluß de Glocken habn gelätt.
For viele Leit gibt‘s Kurzarbeit,
es is dorwagn e schwere Zeit.
Es schnedt enn kaaner meh de Naal,
mor hamstert Klopapier un Mahl!
E manche Hausfrau tat gleich dudeln,
denn in Regal logn kaane Nudeln.
Un aah in unnre Schneiderei
do durften fei de Leit net nei.
„Kontaktlos“ war nu agesat!
Ze unnrer allergressten Frad
habn alle Leit dos agenumme,
sei bluß in Hausflur rei gekumme.
Doch jeder musst in setten Togn
– egal, wuhar – enn Mundschutz trogn.
Mol hot dor Gummi darb gezugn,
de Ohrn nooch vorne ümgebugn,
un bei enn annern, u du Graus,
flugn gleich de Hörgeräte raus.
Dos war nu wirklich gar kaa Spaß!
Bei uns gibt’s Mundschutz, aah „nooch Maß“!
Un bei dar Sach, do spielt gelei
aah noch de Mode wing miet nei.
Denn Kastle, Pünktle, bunte Straafen,
dos ka mor alles bei uns kaafen.

Su manche Fraa fregt sich: „Wos tät
de passen ze menn neie Kleed?“
Mir wolln die Sach net schenner reden,
un mir habn Mitgefühl mit jeden,
dar vun Corona wur betroffen
un woll’n is Allerbeste hoffen!
Doch muss mor sogn, grod sette Zeiten
habn do un dort aah annre Seiten:
Ganz aafach kame alle Leit
nu of de annre Stroßenseit.
De Luft war gahling e wing raaner,
när su zun Spaß fahrn, dos tat kaaner.
De Amsel baut in Ruh ihr Nast,
es gob ja kaum e Gartenfast.
E Zahlück machet kaa Problem,
mor sooch se net, dos war bequem.
Tat mol ewos net su gut riechn,
kunnt’s net in unnre Nos neikriechn.
Dor Mundschutz hot aah wing gefiltert
un biese Reden ogemildert.
Mor könnt, is alles mol benn Alten,
ewos dorvu dorwagn behalten…
Doch leider kam, ganz of de Schnelle,
nu mittlerweil de „zweete Welle“.
E mancher dacht, es wär vorbei,
doch kaaner ka sich sicher sei.
Dos alles is erscht überwunden,
wenn mor enn Impfstoff hot gefunden.
Un is es nochert mol suweit,
do lesst eich impfen, seid gescheit!
Dos alles nimmt schie mol e End,
bis dorthie wascht eich viel de Händ,
ümarmt eich net, macht kaa Getu,
bindt eire Guschle racht schie zu!
Macht’s richtig un bedenkt dorbei:
De Nos gehärt do aah miet nei!
Nammt Rücksicht of die annern Leit,
su fährt mor gut ze jeder Zeit!
Mir machen noch e bissel weiter,
aah nächs Gahr noch.

De Heiße-Schneider

Veröffentlicht am

Grüße 2019

Endlich – mit viel Mut un Kraft
hot’s is Arzgebirg geschafft!
Endlich – nooch viel Müh un Renne
darfen mir’s benn Name nenne:
Walt-Kultur-Arb sei mor wurdn!
Dos war fei e Würgn un Schurn,
doch mir gob’n do gar kaa Ruh,
denn dar Titel stieht uns zu!

Arzgebirger sei net eitel,
hatten kaamol viel in Beitel.
Tradition, die wur geacht,
an de Alten wur gedacht,
an de Bargleit, die vor Gahrn
in de Grubn sei eigefahrn.

Heitzetog ward mancher Stolln
wieder hargericht. Es solln
Kinner un aah Enkeln saah,
wie is Erz wur waggehaa;
wie de Bargleit sich geschunden,
bis se Silber haben gefunden.

Do in Annebarg, Frohnaa,
Ehrndorf, Buchholz, nochert aah
drübn in Schneebarg – überol
gibt’s noch Bargwark uhne Zohl.
In dor Zschorl e Blaufarbn-Wark,
Eisenhütt an Ruten Barg.

In Bad Schlema sieht mor gar,
wos Uranerz-Bargbau war.
Saigerhütt bei Grüntal dort
un su weiter un su fort.
Aah vun Nachbarland Tschechei
is do allerhand dorbei.

Alles dos soll’n mir dorhalten,
racht bewahrn un schie gestalten
un, wenn mir mol nimmer labn,
an de Kinner wettergabn.

Doch mir wurdn net bluß geehrt,
naa, dar Titel, dar beschert
fei – sonst wür’sch emende eng –
uns aah do un dort wing Pfeng.
Die zohlt de UNESCO aus
un for alle springt wos raus.

Net zeletzt, do habn de Schneider
(viel dorvu gibt’s nimmer, leider)
itze allerhand ze tu,
denn es is nu mol esu:
Habit un enn Hut dos ka
niemand kriegn bei C&A!

Also nähe mir nu Kittel
(finanziert durch Fördermittel),
Hüt mit Faderbusch un Borte,
aah Gamaschen, jede Sorte.
Un historisch-alte Sachen
lässt sich aah e mancher machen.

Ganz zeletzt fällt mir noch ei:
Ob gar mol de Schneiderei
wenn’s wie itze wettergieht
of dar Waltarb-List draufstieht?
Bei uns gieht’s noch bissel weiter!

Herzlichst
Eire Heiße-Schneider

Veröffentlicht am

Grüße 2018

Ein Geschrei un ein Gehetz
wagn dan Datenschutzgesetz!
Wie miech dos Gedeber stärt,
weil sich’s doch vun salbst gehärt,
doss mor Zeig vun annre Leit
net su in dor Gegnd rümschreit.
Doch su is – of daare Walt
dreht sich alles bluß üms Gald.
Mancher macht mit Daten Bieses –
drüm brauchts e Gesetz, su hieß es.
Dos Gesetz ward jeden nützen
un soll alle Daten schützen.
Die Idee war gut un richtig,
wie mor’s ümsetzt – dos is wichtig.
Manche sei, kaum war’s beschlossen,
übers Ziel wing nausgeschossen.
Überol, dos is e Treibn,
muss mor itze unterschreibn.
Seitenlang is de Belehrung
zu dar Datenschutz-Erklärung.
Dei Geburtstog, dar kimmt fei
net vun salbst ins Blaatl nei.
Willst de’s su, do musst de schie
vornewag of’s Rathaus gieh.
Dorten gibt’s e Formular,
auszefülln vun Jubilar.

Neilich kam e Kindl a
un zur Schwaster sat dar Ma:
„Is e Hanna? Is e Lutz?“
„Keine Ahnung – Datenschutz!“
Ahnenforschung? Kirchn-Archiv?
Ugelick, do liegst de schief.
„Kaane Auskunft – tut uns leid!
Datenschutz!“ Su läft dos heit.
Bei dan Ganzen is aah schnell
e wing Gaunerzeig zur Stell.
Pass när auf, sonst ka’s passiern,
doss se dich racht okassiern.

Annrerseits ward ugeniert
of dor Stroß telefoniert.
Jeder ka do alles härn
un kaa Mensch tut sich dra stärn.
Facebook, Twitter, Instagram,
Whats-App, wos de Leit su habn:
Dorten ward, ob Tog, ob Nacht
jeder Pups publik gemacht.
Un vür jeden Mittogassen
darf mor‘s „posten“ net vergassen.
Alle haue of’n Putz!
Wu blebbt do dor Datenschutz?
Ach, iech will’s när net vergassen,
wenn mir unnre Kunden massen,
schreibn mir‘s of enn Zettel drauf
un dan Zettel hebn mir auf.
O-Baa, gruße Oberweiten,
Hängeschultern, schiefe Seiten:
Annre Leit erfahrn dos net,
dodorvu ward net geredt.
Datenschutz, ihr könnt’s gelabn,
hot’s bei uns schie immer gabn.
Un do blebbt se aah dorbei

Eire Heiße-Schneiderei!

 

Veröffentlicht am

Grüße 2017

Dos hot‘s früher net gegabn!

 

Heitzetog, do gibt’s ein Zeich!

Ugelick, do denkt mor gleich,

su wos, naa, mor will’s kaum glaabn:

Dos hot’s früher net gegabn!

 

Aaner schrebbt enn annern fei

of senn Handy, dodorbei

stieht dar annere dornabn!

Dos hot‘s früher net gegabn!

 

Manche Hus, su vun dor Stang,

is ne Leiten viel ze lang.

Un su schlaaft in Drack dor Saam.

Dos hot‘s früher net gegabn!

 

Bestellst de wos, do gibt’s im Nu

gleich noch enn Gewinn dorzu.

Du siehst nischt in ganzen Labn!

Dos hot‘s früher net gegabn!

 

De Industrie, die macht ein Stuss,

do löst sich mancher Reißverschluss.

Die nähe net, die tunne klabn!

Dos hot‘s früher net gegabn!

 

Mancher hofft of dare Walt

of wing Zinsen for sei Gald.

Iech gelab, dos blebbt e Traam.

Dos hot‘s früher net gegabn!

 

Husen sei mit Löcher schenner,

ausgefranste T-Shirt-Ränner

muss mor hobn! Su is dos abn.

Dos hot‘s früher net gegabn!

 

Bluß de Heiße-Schneiderei

ubn in öbern Dorf hot’s fei

schie seit langer Zeit gegabn.

Manichs hot Bestand in Labn.

Un mir denken, es ward schie

alles noch wing wetter gieh!

Veröffentlicht am

Grüße 2016

Crottendorfer Anzeiger 2016

Is vergangne Gahr, ihr Leit, war is „Gahr dor Dankbarkeit“!
Wenn ihr mich do itze fregt: Dos wur abn su festgelegt.
Manche Leit, dos muss iech sogn,
taten aber trotzdam klogn un dorbei,
do horcht när hie,
gieht’s uns Deitschen gut wie nie!
Alle Leit habn sot ze Assen,
schlachte Zeiten sei vergassen.
Krieg un Elend liegn zun Glück
fei schie haufen Gahr zerück.
Unner Maaning, die is frei!
Sollt mor do net dankbar sei?
Alles gibt’s in Überfluss,
doss mor net racht suchen muss.
Brauchn mir Zwirn un Futterseid,
Reißverschlüss un Schneiderkreid,
ward‘s bestellt, gleich of dor Stell.
Mit dor Liefering gieht’s schnell.
Stoff aus England – kaa Problem,
ach, wie habn mir’s doch bequem!
Dos is fei e rachts Geschenk.
Wenn iech do an Vater denk,
wie de Schneider knausern mussten,
sich bal net zu halfen wussten.
Weil’s kenn Stoff gob, wur gewendt,
manche Gack wur aufgetrennt.
Außen war se wing blamabel,
aber inne ganz passabel.
Also wur se ümgedreht
un vun Neie zammgenäht.
Aus enn Mantel, enn ganz grußen,
machet mor zwee Kinnerhusen.
Gar nischt wur do waggeschmissen,
alles hot mor aufhebn müssen,
denn mor kunnt net aafach laafen
un sich neie Stoffe kaafen.
Später in dor DDR
gobs dann schie e bissel mehr.
Doch bis in de 80-er Gahre
war su vieles Mangelware.
Sette Zeiten sei vorbei.
Sollt mor do net dankbar sei?
Immer wieder gibt’s aah Leit,
die legn Wert of Maßarbeit.
Ann’re kaafen lieber gleich
in de Läden Aziehzeich,
suzesogn abn vun dor Stang.
Aber is de Hus ze lang oder is e Rock zu weit
nochert brauchn se in dor Zeit
fei enn Schneider. Kummt när har!
Do ze halfen is net schwar.
Dodurch habn mir sot zu tu
un dodrüber sei mir fruh.
Ja, mir könne wirklich fei
racht vun Herzen dankbar sei!
Drüm sogn mir, ihr lieben Leit,
itze in dor Weihnachtszeit

Dankeschön an alle Kunden, die ne Wag zu uns gefunden.
Kummt ins neie Gahr gut nei! Eire Heiße-Schneiderei

Veröffentlicht am

Grüße 2015

Crottendorfer Anzeiger 2015

Is de Hus ewing zu lang
un hängt egal när in Schrank
ka mor, un dos is fei schie,
nauf zun Heiße-Schneider gieh!
Also packt mor seine Hus
in enn Beitel (net zu gruß),
doss se racht schie renklich blebbt,
wenn dor Wind wing Staab hartrebbt.
Sette Beiteln sei net schwar
un liegn überol rümhar.
Doch vor epper dressig Gahrn,
wu mor noch net „Westen“ warn,
tat sich mancher richtig dächten,
hatt’r su enn bunten, echten
Plastebeitel – gar vun OTTO,
oder mit enn annern Motto:
KAUFHOF, QUELLE, NECKERMANN;
SPORTSCHECK, BADER! Ja, un dann
wur die Tüt, dos muss mor sogn,
richtig stolz zu uns getrogn.
Un mir mussten egal saah,
doss de Leit fei nochert aah
wieder zu ihr’n Beitel kame
mit’n richt’gen Kaufhaus-Name!
Paar Gahr später kam de Wende
un dos Knausern hatt e Ende.
Itze kunnt mor orndtlich wüten
mit die bunten Plaste-Tüten.
War’n se klaa wing eigerissen,
wur’n se aafach waggeschmissen.
Un su manche floch, du Graus,
gleich zun Autofanstern aus.
Ja, un itze wardn mor’s inne,
doss die Tüten net verginne!
Denn die landen, horcht när har,
(dos is wirklich kaa Gemahr),
über’s Meer un übern Fisch
ganz zuletzt of unnern Tisch.
Wandern nei in unnern Mogn!
Nu, dos wardn mir schlacht vertrogn!
Naa, die Sach is gar net gut!
Drüm macht’s anners, habt dan Mut!
Möglichkeiten gibt’s do sot!
Schie dor Heiße-Oskar hot
alles in e  Tuch geschlogn
un hot’s übern Arm getrogn.
Mit dan „Packtuch“ ging’s dann aah
feder über Stock un Staa
bis nooch Neidorf, Wiesenthol –
Kundschaft gob’s ja überol.
Hulet salber aans sei Zeig,
hatt e jeder Kunde gleich
seine Tischdeck miet dorbei,
sat: „Do, wickel mir’s wing ei!“
Manche sei mit Taschen kumme,
Perlonbeiteln wurdn genumme.
Un die Beiteln un die Taschen
ließen sich, wenn’s sei musst, waschen.
Letzten Endes tat sich’s luhne
un mor kunnt de Umwalt schune.
Könnt mor’s net bei sette Sachen
aafach su  wie früher machen?

Frohe Weihnacht uns u weiter
wünschen Eich
de Heiße –Schneider

Veröffentlicht am

Grüße 2014

 

 

Crottendorfer Anzeiger 2014

Heier richt wuhl jeds senn Blick
25 Gahr zerück,
wu de Leit mit halle Kerzen
un mit ganz viel Mut im Herzen
of de Stroß gegange sei.
Un dann fiel de Mauer ei!
DDR – die war am Ende,
lus ging’s mit dar grußen Wende!
Schie wing später war’n mor „Westen“,
doch net alles stand zun Besten.
Naabn viel Licht gobs maning Schatten,
wu mir dra ze knaubeln hatten.
Manichs war uns net su racht,
vieles war dorgegn net schlacht.
Neie Autos, weite Raasen
un enn „Swiffer“ statt enn Baasen.
In dor Mode ging’s ze Foden,
egal gob’s enn neie Loden.
Doch zun Glück habn unnre Kunden
trotzdam noch ze uns gefunden.
Denn mir kunnten ja mit jeden
aafach arzgebirgisch reden,
niemand musst sich bei uns plogn
un die neie Wörter sogn:
Boyfriend-Jeans un Cargohose,
Softshell, körpernah un lose,
Skinny, Straight un Classic wide,
un aah e One-Shoulder-Kleid,
Zipp-off-Hose un Slim fit
warn su mancher Mode-Hit.
Peep Toe Pumps gehärn dorzu,
(war’sch net wess: Dos sei fei Schuh).
Darkblue used, Tanktop, Shirt,
irgndwie ward mor ganz verwirrt.
Aah in unnrer Schneiderei
kam nu Zeig, dos war uns nei.
Aaner bracht enn Pulli a
mit kaputte Rannle dra.
Un mir dachten, weil dos stärt,
mach mor’sch su, wie sich’s gehärt.
„Naa, fei net, dos is e neier
un dar war aah ziemlich teier“,
saht dar Kunde, „saht’s när ei,
dos is „in“, dos muss su sei.
Bluß de Armeln sei wing lang,
alles annre gieht senn Gang.“
Wos is lus of daare Walt?
Löcher kosten mehro Gald!
Jeans wardn orndtlich staagewaschen,
ogeniftelt sei de Taschen,

an de Näht ward rimgezuppt
un dor Stoff racht eigeruppt.
Üm die Hus is aangtlich schode,
aber su e Jeans is Mode!
Ziehts dann aber wing an Hinnern,
nähe mir – net bluß bei Kinnern –
(denn dos is ne Leiten lieber)
kreiz un quar paar Zacken drüber.
Nochert sieht’s erscht richtig schie.
Mor muss mit dor Mode gieh!
Bleibt trotz all’n racht fruh un heiter!
Frohes Fest!
De Heiße -Schneider

Veröffentlicht am

Grüße 2013

Crottendorfer Anzeiger 2013
Gibt’s e Hochzig, härt mor jeden
gleich in Dorf dodrüber reden.
Manichsmol do nähe mir
Kleed un Azug dodorfür.
Doch net bluß de Leit, die heiern,
naa, aah manche Orte feiern
„Eheschließung“, denn allaah
brengt mor net viel of de Baa.
Is dor Ort e bissel gresser,
fließen Fördergalder besser.
Un su kame rings in Land
sette „Ehen“ schnell zestand.
Denn dor Staat, mor sollt’s net denken,
tat dan Brautpaarn aah wos schenken.
Crutendorf wollt aah verhandeln
un versuchn, azebandeln.
Scheibnbarg war e Möglichkeit,
aah de Schlaate war net weit.
Un su kam mor ins Gespräch,
ob dann annern wos dra läg.
Ganz zearscht, su is dos aabn,
warn se schie e Herz, e Laabn.
Aber dann su nooch un nooch
gobs wing Deebs üm manche Frog:
Wu ward de is Brautpaar wuhne?
Ward sich de die Ehe luhne?
Waar hot dann de Husen a?
Horcht de Fraa aah of ihrn Ma?
Wos for Name is dann richtig?
Alle, alle Frogn warn wichtig.
Haufenmol wur dischkuriert,
dos un genes ausprobiert.
Mol wur noochgabn, mol gob’s Streit.
Schließlich hieß: Ihr lieben Leit,
ihr habt eich ze früh gefraht,
’s Hochzigsfast ward ogesaht!
Dos war aber gar net schie
un mor kunnt’s net racht verstieh.
Vieles blieb doch aah benn alten:
Scheibnbarg kunnt senn Barg behalten
un de Haad, du Ugelick,
wollten mir fei net zerück.
Kurz gesaht, es half kaa Reden,
de Geschenker ginge flöten.
Alles gieht vun vorne lus
un su hoffen mir fei bluß,
doss nu alles besser ward,
unner Ort bal gresser ward.
Doss net wieder haaßt: „Ach, leider…“
wünschen sich de
                        Heiße-Schneider

 

Veröffentlicht am

Grüße 2012

 

 

Crottendorfer Anzeiger 2012
Liebe Leit, of daare Walt
kriegt mor gar nischt uhne Gald.
Drim, is interessiert wuhl jeden,
wolln mor übers Gald heit reden.
Fang mor mol vun vorne a,
kaum denkt do noch aaner dra
un is itze wuhl verwunnert:
Mitte Nennzaahntes Gahrhunnert
wur mit „Thaler“ noch bezohlt.
Daar war später überholt.
Überol in alle Kassen
(bei uns warn dos kaane Massen),
kunnt mor Mark und Neigrosch saah,
Pfeng und Fünfer freilich aah.
Lange Zeit war alles klar,
aber in de Zwanzgergahr
ließ daar Galdwaart, welche Plog,
sachte arscht, dann gaahling nooch.
Aah bei uns, iech hobs gelaasen,
sei de Preise huch gewaasen:
Azüg kame, dos war stark,
hunnertdressigtausend Mark!
Über Nacht, waar hätts gedacht,
wur de „Rentenmark“ gemacht.
Hattste e Billion in Haus,
wur do aabn e Mark bluß draus.
„Reichsmark“ hieß vun do dor Titel
in dan neie Galdkapitel.
Kaaner hatt dorvu racht viel,
doch de Preise bliebn stabil.
Mannichn fiels Bezohln do schwaar,
weil de Haushaltskasse laar,
also habn mir ageschriebn,
fünfmarkweis wursch eigetriebn.
Wie dor Krieg dann alle war,
wur of aamol jeden klar:
Wos nützt Gald, namm morsch aah zamm,
wenn mor nischt ze assen habn.
Arbit gobs domols in Massen.
Iech kahs heit noch gar net fassen,
wos mir Schneider Tog un Nacht
for de Russen habn gemacht.
Gald war kaa Problem for die
und vergassen waar ich nie
wie e Russ sei Rachning sooch
un erstaunt dann gleich dornooch
freegt: „Bloß hundert Mark?“ verwundert,
„Warum schreiben nicht dreihundert?“
Fix hot Vater reagiert
und de Rachning korrigiert.
Naabnhaar war de Frahd oft gruß,
weil de Russen uns net bluß
Arbit un Verdienst eibrachten,
sondern aah ans Assen dachten.
Brot un Butter, tute Hosen,
paar Zigarrn un in ’ner losen
Unterhus bracht aaner fei
weißes Maahl zur Warkstatt rei!
Doch is „Alliiertengald“
gobs när kurz of daare Walt.
Gleich dornooch, du lieber Schrack,
war is ganze Gald fei wag.
Viele Gahr musst mor sich aabn
dann mit Alu-Chips ogaabn.
Doch is hatt sich schnell erwiesen:
Wichtiger warn de Devisen
un su gobs ze daare Zeit
manchmol Westmark bei de Leit.
Dodormiet kunnt mor dann laafen
un in „Intershop“ wos kaafen.
Noch dor Wende, in Juli,
war de Frahd su gruß wie nie:
Endlich D-Mark of dor Bank!
Leider ging dos aah net lang.
Wieder wur is Gald getauscht,
2:1, wos net berauscht.
Un schie bald, do hieß dor EURO
bei de Leit när noch dor TEURO.
Alles habn mor überwunden,
trei gebliebn sei uns de Kunden
un bezohln wies immer war,
meestens machen s’ is in bar.
Manche überweisen aah,
Schecks sei aah manchmol ze saah.
Raten kriegt, war se garn hätt,
bluß dos aane gibt’s fei net:
Lesst de Galdkart när dorham,
weil mir kaa setts Kastl habn!
Doch kummt trotzdam , su möcht’s sei,
garn in unnre Schneiderei!

 

 

Veröffentlicht am

Grüße 2011

 

 

Crottendorfer Anzeiger 2011

Mir wünschen eich, ihr lieben Leit,
e schiene, ruhige Weihnachtszeit
un noch dorzu, dos is ja klar,
enn guten Start ins neie Gahr!
Aah wünschen mir: Bleibt uns fei trei,
kummt garn zur
Heiße-Schneiderei

Jedes Gahr zur Weihnachtszeit,
obs nu regnt, obs stürmt un schneit,
ob de Sonn vun Himmel lacht,
obs gewittert, blitzt un kracht,
könne alle aans bluß denken:
„Wos waarn mir enanner schenken?“
Früher in dor DDR
war dos Thema aah primär.
In de Läden war nischt lus
denn de Auswahl war net gruß.
Wenns kaa Armbanduhr hoot gaabn,
is mor mit enn Wecker ham.
Daar tat zwar net richtig gieh,
doch zun Schenken ging or schie!
’s gob schie allerhand ze kaafen,
doch mor musst halt tüchtig laafen,
bis mor fand, wos enn gefiel,
Schenken war kaa Kinnerspiel.
Ziemlich leer war manichs Fach,
weil is Angebot su schwach.
Spielzeich, dos war meestens knapp,
allerhand bestand aus Papp.
Un is Aziehzeich dos war
in de Läden aah stets rar.
Doch is gob in daare Zeit
immer gute Maßarbeit.
(Allerdings musst mor do leider
zwee Gahr warten bei de Schneider!)
For de reichen Leit im Land
gobs natürlich allerhand:
Exquisit un Delikat
sollten retten unnern Staat,
denn de Preise warn fei stark:
Schokelade for fünf Mark!
Azüg, Kleeder un su weiter
warn do teirer wie ben Schneider!
Alles stellet offn Kopp
schließlich noch dor Intershop!
Alle Leit warn do perplex,
Westgald un dann „Forumschecks“
brachten Luxus uns von „drübn“.
Do war of dor Streck gebliebn,
wos dor Lenin einst versprochen,
alles dos war zammgebrochen!
Sozialismus war passé,
un de Wirtschaft saht „Ade!“ –
Itze, zwanzig Gahr dornooch
ward bei uns, dos wisst ihr doch,
oft dodrüber bluß gelacht.
Heitzetog, ihr wisst, do macht
mor Geschenker immer gresser,
denn uns giehts ja jeds Gahr besser!
Un mir waarn, iech kahs eich sogn,
mit Reklame bal dorschlogn:
Rasenmäher, Bohrmaschine,
Nüss, Banane, Apfelsine.
Polstersitz mit „Spaßfaktor“,
Hörgeräte for jeds Ohr.
Möbel, glänzend oder matt,
selbstverständlich mit Rabatt!
Hochmoderne Bettmatratzen,
teires Futter for de Katzen.
(früher habn die Meis gefrassen,
doch dos habn se längst vergassen!)
Su viel Zeich gobs fei noch nie
un nu könnt ich bis morgn früh
aufzehln, wos mor schenken könne,
uhne gruß rümhaar ze renne,
denn waar will, daar kaaft komplett
sich dos Zeich im Internet!
Doch bei Garderobe hoot
die Bestelling mancher soot.
Die habn zwar viel azebieten,
doch de Menschen sei verschieden.
Passt de Brust su halbwaags nei,
dann müsst’s unten wetter sei.
Nimmt mor dann de nächste Größ,
passt die zwar übers Gesäß,
aber uhmrim is wos lus:
denn do is dos Ding ze gruß!
Aah de Aarmeln sei ze lang,
mannichn ward do angst und bang.
Doch de meesten denken weiter:
„Ändern kahs dor Heiße-Schneider!“
Röck un Husen mach mor enger,
kürzer, weiter un aah länger.
Un tut aans net übersaah:
Neies Zeich mach mor fei aah!

Ganz an End vun dan Gedicht
wünsch mor eich viel Frahd un Licht
ze Weihnachten un su weiter!
Herzlichst! Eire Heiße-Schneider