Crottendorfer Anzeiger 2009 Ward mor älter, denkt mor aabn oft an sei vergangnes Laabn. Aah bei mir is dos esu un is stelln, kumm iech zur Ruh, sich dann de Gedanken ei an de alte Schneiderei. Manchmol traam iech fei sugar vun daar Zeit, die früher war, denk an die vergangne Gahr, wu dor Vat mit dor Zigarr hot sich of sei Bud geschwunge. In dor Waarkstatt warn mir Gunge ja fast jeden Tog dorbei, denn in unnrer Schneiderei gings trotz Arbit lustig zu, dos is heit noch immer su. War de Woch rim, dos is klar, wur dos Zeich, wos fartig war, sunnobnds ogeliefert dann, aah mir Gunge mussten ran. Ze de Nachbarn warsch net weit un mir Kinner hatten Zeit. Habn mirs Packel fortgetrogn, sollten jedes Mol mir sogn: „Von menn Vater enn schinn Gruß und do breng iech eier Hus krieg ich Trinkgald nu von eich, soll ich mich bedanken gleich!“ – Seit iech mich besinne kah, kame Leit von auswarts ra. Un als Gunge, dos war schie, durften mir miet liefern gieh. Schlaate, Scheibnbarg, Wiesenthol war`n is Ziel su mannichs Mol. Fahrrod, Füss un Bimelbah trugn uns mannigs Baargl na. Später bie iech lusmarschiert, hob gemassen, aprobiert, nahm mir for de alten Leit, wie dor Vater domols Zeit. Aah bie iech in all dan Gahrn mit’n Moped rimgefahrn. Un miech fuhr mit senn Trabant unner Dietmar oft durchs Land. Wenn mor kame, wie gesaht, habn de Leit sich stets gefraht. Könne itze, viel Gahr später, manche Kunden net gut feder, sogn se uns: „Kummt när mol ra, guckt mei Aziezeich eich a, alles muss ben Waschen fei irgndwie eigegange sei!“ Un nu fährt de Monika dann su fix, wie se aabn kah, mit’n Rod ze sette Leit. Manchmol is es ja net weit. Wenn se ’s net dorstrampeln kah, nochert fährt se aah ihr Mah. Wenn iech saah, wie alles su racht schie klappt, do bie iech fruh. Doss racht lang su bleibn noch möcht wünscht dor Heiße-Leberecht |